Gweld arwyddion cam-drin domestig

Mae'n bwysig bod yn ymwybodol o arwyddion cam-drin domestig. Gall gynnwys trais corfforol neu beidio, a gall gynnwys y cam-drin domestig a nodir isod, neu unrhyw fath arall o gam-drin domestig. Byddwch yn ymwybodol y gall ymddygiad sy'n rheoli, rwystro rhywun rhag datgelu eu bod yn cael eu cam-drin.

Cam-drin Corfforol

Gall Cam-drin Corfforol gynnwys anaf corfforol gan gynnwys torri esgyrn, cleisio, briwiau, gwaedu, anafiadau mewnol… sy'n ganlyniad i rywun yn gwthio, cicio, dyrnu, ceisio tagu, brathu ac ati.

Cam-drin Seicolegol

Gall Cam-drin Seicolegol (o fewn cam-drin domestig) gynnwys ynysu oddi wrth deulu a ffrindiau, chwarae gemau meddwl, rheoli ble maen nhw'n mynd, pwy maen nhw'n ei weld ac ati, symud terfynau yn gyson, stelcio ac aflonyddu, pryder gwahanu (tramgwyddwr) gan arwain at eiddigedd / meddiant gormodol , blacmel emosiynol, y troseddwr yn bygwth lladd neu niweidio ei hun.

Cam-drin Emosiynol

Cam-drin Emosiynol sydd â chysylltiad agos â cham-drin seicolegol, os yw rhywun yn dioddef y canlynol byddai hyn yn awgrymu bod cam-drin emosiynol / seicolegol yn digwydd:

Sarhad, beirniadaeth gyson, bychanu, bygythiadau i ladd neu niwed, bygythiadau i fynd â phlant, dweud wrth gyflogwr ac ati, dod o hyd i fai yn gyson a chael gwybod na allant wneud unrhyw beth yn iawn (yn llygaid y tramgwyddwr).

Gall rhywun sy'n dioddef camdriniaeth emosiynol / seicolegol ymddangos eu bod yn ddigalon, yn isel ei hyder, yn bryderus ac yn isel ei ysbryd, yn cael teimladau hunanladdol, os yw’r cam-drin yn amharu ar ei weithrediad gwybyddol, yn ei arwain at fethu â gwneud penderfyniad drosto'i hun, hunan-niweidio, yfed alcohol / defnyddio sylweddau yn ormodol (fel strategaeth ymdopi), problemau cysgu.

Cam-drin Ariannol

Cam-drin Ariannol - Os yw rhywun yn dioddef cam-drin ariannol, mae'n bosibl na chaiff fynediad i'w arian ei hun (os yw'n oedolyn), neu efallai na fydd yn gallu gwario arian arno'i hun na'r plant. Mae arwyddion eraill yn cynnwys arian yn mynd ar goll / yn cael ei ddwyn, y dioddefwr yn cael ei atal gan y tramgwyddwr rhag cael swydd, y dioddefwr yn mynd i ddyled yn ei enw ar ran rhywun arall, y dioddefwr yn cael ei orfodi i drosglwyddo arian neu gael ei ecsbloetio'n ariannol ( eu harian yn cael ei gymryd trwy dwyll, triniaeth a / neu gamddefnyddio a/neu orfodaeth gan bartner, cynbartner neu aelod o'r teulu).

Cam-drin Rhywiol

Gall Cam-drin Rhywiol gynnwys unrhyw weithred neu weithgaredd rhywiol nad oeddent am ei wneud a / neu nad oeddent, neu na allent ganiatáu iddo; byddai hyn yn dangos bod cam-drin rhywiol yn/wedi digwydd. Mae'r mathau o weithred rywiol yn cynnwys trais rhywiol, perfformio gweithredoedd rhywiol, cael eu diraddio, testunau graffeg rhywiol, porn dial, cael eu gorfodi i wylio pornograffi, cam-drin defodol, anffurfio organau rhywiol menywod, llosgach, cam-fanteisio rhywiol, beichiogrwydd dieisiau.

Yng Nghymru defnyddir y term trais rhywiol i ddisgrifio pob math o gam-drin rhywiol, gan gynnwys cam-drin plant yn rhywiol.

Rheoli Gorfodol

Gall Rheoli Gorfodol fod yn anodd ei adnabod. Gall gynnwys trais corfforol neu beidio, a gall gynnwys unrhyw rhai neu'r holl fathau eraill o gam-drin domestig a nodwyd uchod. Fodd bynnag, mae'n sicr yn cynnwys mathau seicolegol ac emosiynol o gam-drin ac ymgeision i reoli a dylanwadu ar y dioddefwr. Gall fod yn cam-drin parhaus ar lefel isel, sydd yn cael effaith emosiynol / seicolegol hirdymor ar y person sy'n dioddef. Mae yna risg bob amser y gall ymddygiadau rheoli gorfodol waethygu i drais.

Cam drin ar sail ‘Anrhydedd’

Gall cam-drin ar sail 'Anrhydedd’ gynnwys ffurfiau o gam-drin seicolegol, emosiynol, corfforol, rhywiol ac ariannol (fel y disgrifiwyd yn flaenorol), y gellir eu cyflawni gan sawl aelod o'r teulu yn enw‘ anrhydedd’. Priodas dan orfod hefyd (peidio â'i gamgymryd am briodasau ymhlith unigolion sydd wedi dewis cael priodas wedi'i threfnu)

Cliciwch am fwy o wybodaeth am drais yn erbyn menywod, cam-drin domestig a thrais rhywiol