Categoreiddio a diffinio camdriniaeth

Gall camdriniaeth ddigwydd unrhyw le - mewn cartref preswyl neu nyrsio, ysbyty, yn y gweithle, mewn canolfan ddydd neu sefydliad addysgol, mewn tai â chymorth, yn y stryd neu yng nghartref yr oedolyn diamddiffyn ei hun.

Mae'r 5 categori o gamdriniaeth, fel y'u nodir yn Neddf Llesiant Gwasanaethau Cymdeithasol (Cymru) 2014, wedi'u rhestru isod:

Cam-drin Emosiynol neu Gam-drin Seicolegol

Cam-drin emosiynol neu seicolegol yw achosi dioddefaint meddyliol yn fwriadol i berson sy'n agored i niwed, a hynny gan berson mewn sefyllfa lle dylid neu disgwylir ymddiried ynddo

Cam-drin Ariannol

Mae cam-drin ariannol neu faterol yn golygu dwyn neu gamddefnyddio arian, eiddo neu adnoddau unigolyn sy'n agored i niwed, a hynny gan berson mewn sefyllfa lle dylid neu disgwylir ymddiried ynddo. Mathau cyffredin o gam-drin ariannol yw pan fydd eraill yn camddefnyddio budd-daliadau'r wladwriaeth yr oedolyn bregus neu roi pwysau gormodol arnynt i newid ewyllysiau. Mae cam-drin ariannol/materol yn medru digwydd rhwng un person agored i niwed a pherson arall sydd hefyd yn agored i niwed

Esgeuluso

Esgeuluso yw pan na fydd unrhyw berson sydd yn gyfrifol am ofalu am neu warchod person agored i niwed, yn darparu'r gofal hwnnw y byddai person rhesymol mewn sefyllfa debyg yn ei ddarparu

Cam-drin Corfforol

Cam-drin corfforol yw unrhyw boen, dioddefaint neu anaf corfforol a achosir yn fwriadol gan berson sydd yn gyfrifol am ofalu am neu warchod person agored i niwed, neu sydd mewn sefyllfa lle dylai'r person agored i niwed ddisgwylir ymddiried ynddo

Cam-drin Rhywiol

Mae cam-drin oedolion yn rhywiol yn cyfeirio at gynnwys oedolyn agored i niwed yn uniongyrchol neu'n anuniongyrchol mewn gweithgaredd rhywiol y maent yn anfodlon arno neu'n methu â rhoi eu caniatâd gwybodus, neu nad ydynt yn ei ddeall yn llawn, neu sy'n groes i dabŵ cymdeithasol o ran rolau teuluol